الالعاب الشعبية القديمة....

مرحـــبا بنور اسمك هنا ..كم جميلة الطفولة ..لم يكن بوقتها الاتاري والبليستيشن والكمبيوتر والعاب الفلاش
         
هلو شلونكم اخباركم اموركم صحتكم اوضاعكم ان شاء الله كلشي وكلاشي زين وعايشين عيشه سعيده وتتذكرون شجنتو اتسوون من جنتوا اتلعبون بالشارع لو بالمدرسه ...فمثلا اتذكرجان اكو مواسم الكل لعبه شعبيه بالعراق مثلا الدعبل قبل الامتحانات والصكله اول ايام العطله والتوكي البنات كل وكت يلعبنه (كبي يس كبي نو ) والبايسكلات بالصيف والكلكلي اذا سامعين بي هم بالعطله هاي من غير الطيارات والجلكه والتصاوير واشكال والوان ..طبعا هي احلى شي بالعراق هاي اللعبات اللي العلاقه بين الناس والجيران ..فهذا الكروب سوينا




كنت العب  ((دجه علو)) ولعبة ركيضان وختيلان ((غميضان))
كذلك وقعت الحرب على ...وهي لعبة شعبية عبارة عن دائرة كبيرة مكتوب بداخلها كلمة قف
ثم تتفرع منها خطوط كاشعة الشمس تماما وبنهاية كل خط نكتب اسم دولة معينه
ويقف عليها الاطفال  ثم نختار بالقرعة من يبدأ ويقول هذا كلمة وقعت الحرب على ..فيختار دولة ههههه كالعراق مثلا ....فالكل يركض بعيدا عن القرص وفقط من صاح اسمه يقف بنصف القرص ويقول بسرعة ((قف))
فيجب الوقوف  فيختار اقرب شخص له فيقول منا الى  اليمن مثلا عشر خطوات كبيرة  فيسير هذه الخطوات له وان صدق ظنه فاز وخسر اليمن وخرج من اللعبة وان لم يكن توقعه صحيح هو من سيخرج من اللعبة وهكذا الى ان يبقى الاخير هو الفائز



كذلك هناك لعبه جر الحبل من فريقين  وكلنا لهبناها ..ولعبة آس آس اسيلو
ولعبة الصنم وهي ان نقول بصوت عالي طيروا  طير وا  طيروا  ونحلق بايدينا كجناح  واحدنا يقول قف فنقف دون اي حراك  فيحاول هذا ان يعمل حركات هزلية تضحكنا فان نال منا خسرنا وهكذا

من منكم يتذكر لعبة لعبها حين كان صغيرا

شفت الدعابل اتذكرت اخوية كان يعشقهااااا عبالك مال الدنيا عنده فد 500000 دعبله  يمكن هم قليلة



وشلون يضمهن بعلبة كبيرة ورايح جاي بالبيت شايلها بايده عبالك كنز ههههههه



عاشات الايادي حبيبة

 
عمي ارمنية  اذا انتي اخوج عنده 5000 دعبل
اني بصغري عندي 10000 ويجوز اكثر
عمي خليهه سكته  امي الحجية بنت ريمة تكوول ممخلفه بنت اني
هههههههه
تحياتي حبيبة واسعدني المرور

امونه نسيتي لعبة الخرز مال البنات اني جنت العبها عندي جان اشكال خرز
وكذلك لعبة بيت ابو بيوت جنا نلعبها جنت البس حذاء والدتي ابو الكعب العالي واشيل جنطتها يعني اني امايه واختي عود الجيران واروح خطار عدها وتقدملي الشربت والجاي
ولعبة سنبيلة السنبيله على النبي صلينا كانت لعبه مثل طفر الموانع
ولعبة الالوان واحد من الاعبين يكول لون ولازم نلكاها ونلزمه واللي مايلحك عليه خسران
والطوبات اني خالتج جنت مولعه بيها والعب بثلاث طوبات مرات هسه عود اضحك ولدي العب بالبرتقال مثل المهرج يظلون يضحكون يكولولي ماما هاي اشلون تلعبيها
ولعبه الحبل مو جر الحبل يعني اثنيين يلزمون الحبل كل واحد من جهه وواحد يطفر بالوسط من يفرون الحبل لعبه كلش حلوه ومرات الواحد يلعبها وحده او اثنين يدخلون بحبل واحد يسموها عزيمه
ولعبة حلال دم الغزال هي مثل لعبة الغميضان بس واحد يوكف وجهه على الحايط ويعد من 10 الى الميه الباقين لازم يختلون كلهم فيكوللوه حلال دم الغزال لازم هو يلكيهم واللي يلزمه هو الخسران
الله امونه ذكرتيني بايام الطفوله ومااروعها من ايام

اي والله فاتتني كل هذه الالعاب 
فعلا كنت العب  مال حبل  هذه اللعبة كنت بيهه دوم اخسر يجوز حدي لرقم 4  وبعد ما اكدر أطفررر ههههه  لان اخاف
وبيت بيوت يووووو  لتكولين  ياربي شكد كنا نلعبهه  نجيب الجدر والمواعين  ونصب ماي على اساس شوربه لو مرات ناخذ من المطبخ اكل ويصير طبخ حقيقي هههههههه   
وكنا نلعب  بالحديقة  صالون  ناخذ كراسي الحديقة  وميز ونخلي المشط والحمره والماشات  والقراصات ونلعب من تجي ام جيرانه هي وبناتهه  يمنه  شكد حلوه كانت ذيج الايام  من غير الركيضان والختيلان ودجة علو
وسلمان يكول هااي لعبة كنت احبهه  وكيفيتها هو وحده منا تقول سلمان يكووول ((مثلا   كمزوا ههههه)) فلازم نظل إنكمز  إنكمز الا ان تقول سلمان يكول قف  إذا قالت  قف بدون كلمة سلمان يكول   نخسر اذا وقفنه هههه
كانت ماما من تضوج من هوستنه وقت الظهر  تلعبنه سلمان يكول  وهي تكول سلمان يكول  روحوا ناموا هههههه  فنحط راسنه على المخده وكل ما نريد  نكوووم  تكول ماما لا لا سلمان ميقبل ههههه وفعلا  شوية شوية  نروح بسابع نومه
جدا اسعدني  مرورك واضافتك الرائعة  باركك ربي حبيبة

امونه الغاليه سوالفج كلها حلوه تسعديني من تسولفين يخليج ويسعدج يارب.

امونه الغاليه سوالفج كلها حلوه تسعديني من تسولفين يخليج ويسعدج يارب.

والله يا خالة ام علي الحبيبة جدا احب  كلامك وقصصك وخواطرك وصورك ههه وكل شيئ يجي من ايدج المباركة احبه
ربي يديم علينا ظلج وحسج وتواجدك غاليتي الف شكر لك

الله يخليج حبيبتي ربي يدوم المحبه بكلوب الكل ويبارك بهاللمه الحلوه.

اني جنت بطل الدعبل بالمنطقة  :D
عاشت ايدج على الموضوع الحلو
هيج اسماء و عادت كانها مكينة زمن
ترجع بنا الماضي بلحظات

هههههههه   كنت هوايه اخاف من امشي من يم اطفال يلعبون دعبل اخاف لتطير  دعبله وتعور راسي لو عيني  هههههههه
تحياتي اخي نوبل اسعدني المرور

أمونه الغاليه ، أتذكرت لعبه أسمها الصكله جنا نلعبها بالحصو مو نتضارب بيه لا ، يعني نخلي فد 5 حصوايات بالكاع ونخلي ايد وحده عليها والثانيه نشمر حصوه بالهوا ونلكف اللي بالكاع ، جانت لعبه كلش حلوه ، بس بعدين كالولنا اللي يلعبها يموت أبوه وبعد ما لعبناها ، حجي جهال .

أمونه الغاليه أشكرج حبيبه كل مواضيعج واحد احلا من اللاخ.

عاشت ايدك امونة رجعتينا .... سنة ،،مراح اكول شكد ههههههههه
اني كنت العب العاب الصبيان دعبل بلبل حاح واكثر من مرة اكلت بسطة من اخوية الكبير يروح ويرجع يلكيني العب وية الولد شمدريني الضاهر استهوتني اكثر بس شنو وداعتج كنت اغلبهم
واذا ردت البس ثوب الانوثة العب دور حجية أم ذويب هاي الحاجة الرائعة كانت تبيع اللبن والدهن الحر على بيوت المنطقة وكانت تجي من طريق طويل ولازم لازم تكعد تشرب استكان الجاي بالخاشوكة وتخيلي لعد شكد تطول تاخذلها نص ساعة بالاستكان
المهم بالليل والكل كاعدة بالهول وصاحوا اهلي يلا وينها ام ذويب طبعا اني اكون لابسة الفوطة مالت بيبتي الله يرحمها والجرغد والدشداشة وكلها تسحل وراية واكعد اشرب الجاي بخاشوكة الجاي واقص قصص ام ذويب الرائعة ربي يرحمها مليون رحمة
اي امونة شذكرتينا ههههههههههههه ياريت الزمن يعود ياريت
تحياتي حبيبة

عاشت ايدج امونه حبيبتي مشتاقتلج ومشتاقه لسوالفج الحلوة ذكرتيني  بلعبه كبي نو  ولعبه شدة يا ورد اخر مرة لعبته قبل سنتين ويه بنات اختي عود اني خالتهم الجبيرة هههههههههه

ربي يسعد ايامج حبيبه

موضوع جميل عاشت الايادي.

السلام عليكم ورحمة الله وبركاته

كلهن عرفناهن بس ( الكلكلي )  ماماره علينا

شكرا لكم موضوع رائع