سؤال عن كيفية طبخ الشجر الذي يشبه البطيخ الاصفر

   الى اخواتي في بيت المغتربين السلام عليكم
 اخواتي   جذب نظري في الاسواق بانقره الشجر اللي احنا بغداد
 نسميه ( شجر اسكله ) وهو يشبه البطيخ الاصفر واني سامعه يسووه
 مركه لكن ما اعرف شلون طريقة عمله .. واني شفتهم يقسموه على شكل
 كيلوات وينظفوه وحاضر لان الشجره مالته كبيره بحدود 5 كيلوات
 ان شاء الله اكو وحده تعرف شلون طريقة طبخه ونجرب . ونشوف
  منو الشاطره بالموقع واشكركم

سألت سؤال عن كيفية طبخ الشجر( شجر الاسكله) الذي يشبه البطيخ الاصفر
طوخ وهو متوفر باسواق انقره بكثرة ولكن سامعه يسون منه  مركه ..لحد الان ولا وحدة من خواتي جاوبت ..  يظهر كلنا منعرف ..

أٌختي العزيزة أحلام البغدادية، إن كُنتِ تَقصُدين اليقطين، فلَكِ هذا الرابط
http://www.youm7.com/story/0000/0/0/-/1781364#.VnG51XgrJdg

وإن كُنتِ تقصُدين (القرع الرومي) فَهنالك وصفات
رجاءً حددِ
تحباتي

  الاخت العزيزة احلام البغدادية    والله اني سامعه من كنا بالعراق ان هذا الشجر اللي يشبه البطيخ يعملون منه مربى لكن ما اعرف شلون طريقة العمل   وبالنسبة للمرق  اني سامعه يعملون مرق منها ويضيفون شكر معه لكن ما اعرف شلون طريقة العمل وياريت نسمع بالمستقبل حتى بالموسم نعمل مرق وان شاء الله نتعلم   ويطلع اكلة تخبل .. ونعزم الاعضاء مال المنتدى .. وياريت اخونا  msak   يسأل الاتراك عن طريقة العمل  لان اخونا مبين عليه  بلبل بالتركي ويعلمنا الطريقة ..

ما ادري مسموح النا نكتب بامور الطبخ لو لا هنا ههههههههه
و نحن صغار في العراق و لحد الان نأكل هذا القرع او اليقطين او الشجر الحلو باختلاف المسميات
الطبخ مع الحمص و اللحم و المعجون يقدم كمرقة مع التمن
لكن هنا في تركيا ما لاحظته هو قلة نسبة السكر كما عرفناه في العراق
اما عن كيفية طبخ الاتراك انفسهم لهذا الشجر فصراحة لدينا جارة تركية تزورنا بين الفترة و الاخرى و مرة اكلت عندنا الطبخ العراقي لهذا الشجر و طبعا تلذلذت به و مدحته كثيرا  ( طبخ ام عبد الله مو طبخي هههههههههههه ) و أخذت تسرد طريقة استعماله له ، لكن مع الاسف لا اذكر ذلك لانه من فترة طويلة كما اني غير مهووس بالطبخ
لكن ان شاء الله تدللوا و ان شاء الله نسألهم و نرد لكم الخبر 

شكرا اخونا   msak  وننتظر منك اولا طريقة طبخه على الطريقة العراقية اولا يعني  طريقة طبخ (ام عبد الله ) وبالتالي طريقة الاتراك . شكرا ابو عبدالله ..  واني وام تغريد راح نسوي جدر كبير حتى كل العراقيين اللي بتركيا ياكلون .والف عافيه مقدما والسفن اب ورا الاكل .

شكرا اخونا   msak  وننتظر منك اولا طريقة طبخه على الطريقة العراقية اولا يعني  طريقة طبخ (ام عبد الله ) وبالتالي طريقة الاتراك . شكرا ابو عبدالله ..  واني وام تغريد راح نسوي جدر كبير حتى كل العراقيين اللي بتركيا ياكلون .والف عافيه مقدما والسفن اب ورا الاكل .

شكرنا موصول لجنابكم ايضا
و تدللوا و ان شاء الله سوف أكلف ام عبد الله تكتب المشاركة القادمة حول الطريقة العراقية
و الطريقة التركية بالقادم ان شاء الله
مع تقديري

   الاخ  msak    اني انتظر واعتقد اختي احلام البغدادية  تنتظر
   طريقة طبخ الشجرالمثل البطيخ .  لان راح يخلص وقته واحنا ننتظر
   شلون نطبخه وسلامنا لام عبد الله

طريقة طبخ الشجر ( اليقطين )
1- على شكل مرق :
طريقة طبخ مرقة  الشجر الاصفر او الاحمر  (اليقطين)حسب طرريقتتي :
- انقطع اليقطين مكعبات وانغسله بلماء
- وبعدين انخلي اشويه دهن في القدر و نقلي بيه اليقطين المقطع ونخليه على نار متوسط لمدة عشر دقائق في الدهن
- ومن ثم انضيف له معجون الطماطم وملح حسب الرغبة
- ونخلي ماء على قدر مستوى الشجر في القدر ونخليه فد ربع ساعه يفور
- وقبل هذا كله الحمص يتفور وكذلك اللحم حسب الرغبه -ووره الربع ساعه انضيف الحمص المتفور واللحم المستوي للقدر ، ونضيف له كميه ماء اخرى ايضا حسب الرغبة ، بالنسبه اليه احب اخلي قليل لان احبه ثخين
- ببساطة الطريقة أعلاه :يعني نفس طريقة تحضير مرقة  الشجر الاخضر المعروف
- وتركبين التمن وياه -والف عافية-

2-حلاوة اليقطين-تعلمته من تركيه-:
- تقطعين اليقطين مكعبات
- وتخلين شوية دهن في قدر وتخليه على نار مع سكر ( الكمية حسب الرغبة ) وتخليه على نار متوسطه لحين ما ينضج مع التقليب بين حين واخر ، ويصير مثل العجين
- وتوضع في  صحون
- وتوضع مبروش الجوز ايضا او الجوز الناعم حسب الرغبة على اللحلاوة عند التقديم ، وابكيفكم ايشي تحبوه

والف عافيه

اني ان شاء الله وفيت بوعدي

   عاشت ايدك ابو عبد الله كفيت وفيت ..  ويوم غد اجرب الطريقة الاولى
   ( المرق ) وبعد غد  طريقة الحلويات التركيه ..  وشكرا الك ولام عبد
   الله ..  وتسلمون ...

   عاشت ايدك ابو عبد الله كفيت وفيت ..  ويوم غد اجرب الطريقة الاولى
   ( المرق ) وبعد غد  طريقة الحلويات التركيه ..  وشكرا الك ولام عبد
   الله ..  وتسلمون ...

انتم السالمون ، كما ان شكرنا موصول لكم ايضا
و بالتوفيق