المحرر موضوع: زهيريات وعتابة ... (زيارة 113557 مرات)

HOWDY · « **في:** Mar 24, 2011, 08:33 مسائاً »

قصيدة زهيرية سباعية من نوع الذهب الأحمر
**********************************************

مـو بَسْ عليـّه القدَرْ حُكمـَه عَلبشـر يجري

ساعـة فرحَـة وسـاعة أمطـار إلدمـعْ يجري

هظيمة عُمري وَيْ فرگـاك بالحِرمانْ يجري

ماريد حنيّة چـذِبْ لا جبر خاطر ردِت بيمنْ

حِرت يا زمن إلمن اكـذبْ لو اصـدّ گـ بيمنْ

الـگـلب من حـرگـة ضـلوعي... رحَـل بَيْمنْ

سـَفينة دونْ شــراعْْ وَسْـط المـوجْ... يجري

alarmania · « **رد #1 في:** Mar 24, 2011, 09:18 مسائاً »

هودي شنو رايك تغير العنوان وتسويه زهيريات ؟
حتى تكون صفحة مفتوحة للمشاركة اليومية

عاشت ايدك ع الزهيري الجميل

وهاي طبعا منقولة كذب الارمنية تعرف تكتب زهيري ههههههههه

يا منهل الروح روحي لو ترد منهلك
ما جان طول العمر شكوى انبدت منهلك

تدري بهلاكي وتناشدني بدهر منهلك

منهو الك غيري وغيرك ما هلكني احد

واهلك رموني بتهم من نار هجرك احد

سلمت امري وامرك وامرهم بيد واحد احد

منك عسى الله ياخذ حوبتي ومنهلك

HOWDY · « **رد #2 في:** Mar 24, 2011, 09:27 مسائاً »

شكرا لاقتراحك سيدتي الفاضلة وساقوم بتغيير العنوان الى زهيريات مع كل الممنونية ومن خلال شخصك الكريم اتوجه بالدعوة لكل من لديه ابيات من الزهيري ان يتفضل مشكورا بتطريز هذه الصفحة بهذا النوع الجميل من قصائد الشعر

اما بما يتعلق بقدرتك على كتابة الزهيري فاعتقد ان من الممكن ذلك ولا يشترط ان تبدأي بالزهيري السباعي الاحمر بل يمكن ان تبدأي بالابيض او الخماسي او الرباعي وانا واثق انك ستجدين نفسك قد ابدعت بما تجود به روحك الشفافة

باركك الله سيدتي الكريمة ودمت بكل الود

الاماني · « **رد #3 في:** Mar 24, 2011, 09:32 مسائاً »

جدا حلو الموضوع وفكرته باركك ربي تحياتي
ولو مفهمت شنو سباعي وخماسي ممكن تسلط لنا الضوء ولو بشكل مبسط

HOWDY · « **رد #4 في:** Mar 24, 2011, 10:08 مسائاً »

مقتبس من: الاماني في Mar 24, 2011, 09:32 مسائاً

جدا حلو الموضوع وفكرته باركك ربي تحياتي
ولو مفهمت شنو سباعي وخماسي ممكن تسلط لنا الضوء ولو بشكل مبسط

عزيزتي الاماني بالبداية اشكر ابداء الراي بالقصيدة
الزهيريات هي نوع من الشعر مستقل بذاته وقد تكون من الشعر التقليدي او الشعر الشعبي وهي الاكثر انتشارا في منطقة الخليج العربي مع ان نشوءها كما يعتقد البعض كان في العراق الا انها تحورت فيما بعد لتصبح ابوذية

وهي انواع

السباعية وتتكون من 7 ابيات وبدورها تنقسم قسمين الاحمر والابيض

الزهير ( الأحمر ) ، تكون القافية لكل اخر كلمة في البيت واحدة مع اختلاف المعنى وذلك في الابيات الثلاثة الاولى
يتلوها ثلاث ابيات بكلمات مختلفة عن الثلاثة الاولى
اما البيت السابع فنجد اخر كلمة من الابيات الولى

اما الابيض فنفس الفكرة مع التقليل من شدة القيود المفروضة على الشاعر حيث يمكنه التصرف
بادراج نفس الكلمة بنفس المعنى

الخماسية

من خمس أشطر القافية في الثلاث الأولى واحدة
وتكون في كل شطر بمعنى اخر
تتغير قافيتها في الشطر الرابع
ومن ثم تعود على نفس القافية في الشطر الخامس .

الرباعية

عبارة عن اربع أربع أشطر ، وتكون القافية فيها واحدة ،
والافضل ان تحمل في كل شطر معنى اخر

الف شكر لكرم المتابعة

الاماني · « **رد #5 في:** Mar 24, 2011, 10:49 مسائاً »

عاشت ايدك واشكرك على الايضاح لعد راح احفظهن زين واكتب زهيريات وانت تمتحني وتقيم كلماتي
مو متنطيني عشرة من عشرة هههههه
تحياتي لك اخي المحترم

alarmania · « **رد #6 في:** Mar 24, 2011, 10:56 مسائاً »

مقتبس من: HOWDY في Mar 24, 2011, 09:27 مسائاً

شكرا لاقتراحك سيدتي الفاضلة وساقوم بتغيير العنوان الى زهيريات مع كل الممنونية ومن خلال شخصك الكريم اتوجه بالدعوة لكل من لديه ابيات من الزهيري ان يتفضل مشكورا بتطريز هذه الصفحة بهذا النوع الجميل من قصائد الشعر

اما بما يتعلق بقدرتك على كتابة الزهيري فاعتقد ان من الممكن ذلك ولا يشترط ان تبدأي بالزهيري السباعي الاحمر بل يمكن ان تبدأي بالابيض او الخماسي او الرباعي وانا واثق انك ستجدين نفسك قد ابدعت بما تجود به روحك الشفافة

باركك الله سيدتي الكريمة ودمت بكل الود

اشكرك جدا اخي هودي لتلبيتك طلبي فعلا قبل ما كنت اعرف الفرق بين الابوذية والدارمي والزهيري
لكن احد الاخوة الافاضل ببيت الحجي نزل موضوع زهيريات واكتسبت منه بعض الالمام بفكرة الزهيري
لكن ان اكتبه انا لا اعلم حقا اجده صعبا جدا علي لكن ربما بيوم ما احاول لما لا لكن اظنني لن انجح فيما لو اردت ان تقيم ما ساكتبه ههههههههههه
الله كريم ربما حاولت لاحقا بكتابته
اشكرك مرة اخرى ودمت بكل الخير والابداع دوما
تحياتي

HOWDY · « **رد #7 في:** Mar 24, 2011, 11:00 مسائاً »

مو من عيني بس انتي كتبي وهاي من هسة مية من عشرة
:ahalna_Signs (63): :ahalna_Signs (61): :ahalna_Signs (37):

HOWDY · « **رد #8 في:** Mar 24, 2011, 11:08 مسائاً »

مقتبس من: الأرمنية في Mar 24, 2011, 10:56 مسائاً

اشكرك جدا اخي هودي لتلبيتك طلبي فعلا قبل ما كنت اعرف الفرق بين الابوذية والدارمي والزهيري
لكن احد الاخوة الافاضل ببيت الحجي نزل موضوع زهيريات واكتسبت منه بعض الالمام بفكرة الزهيري
لكن ان اكتبه انا لا اعلم حقا اجده صعبا جدا علي لكن ربما بيوم ما احاول لما لا لكن اظنني لن انجح فيما لو اردت ان تقيم ما ساكتبه ههههههههههه
الله كريم ربما حاولت لاحقا بكتابته
اشكرك مرة اخرى ودمت بكل الخير والابداع دوما
تحياتي

لا لا اكيد تكدرين باذن الله وهسة تشوفين من تبدين شون يصيرلج واهس وانشالله نشوف ابداعاتج عن قرييييب
تحياتي

الاماني · « **رد #9 في:** Mar 24, 2011, 11:16 مسائاً »

مقتبس من: HOWDY في Mar 24, 2011, 11:00 مسائاً

مو من عيني بس انتي كتبي وهاي من هسة مية من عشرة
:ahalna_Signs (63): :ahalna_Signs (61): :ahalna_Signs (37):

هههههه لا لعد ما اكتب لان ضمنت النجاح هههههههه
تحياتي لك

HOWDY · « **رد #10 في:** Mar 24, 2011, 11:41 مسائاً »

هههههههههه والله عليج سوالف تمووووووووت من الضحك
باركج ربي وجعل ايامج كلها سعااااااادة

الاماني · « **رد #11 في:** Mar 25, 2011, 12:08 صباحاً »

اتذكر هااي مرة كتبتهه من تاليفي باحد الردود

مو تقلد عليه هههه ولا تضحك على الخربطه هههههه هي مجرد محاولة

كم ألم بيه اسكت وأدآري
هجرني الفرح وفاركت دآري
ادري يلمحب تعرف كلشيئ ودآري
زمانك يلغالي اخذ روحك من بين ايديه

HOWDY · « **رد #12 في:** Mar 25, 2011, 12:32 صباحاً »

الله... بس يعني ليش تتصورين اضحك؟

اصلا قسما بالله وبدون اي مبالغة حسرتني العبرةمن قريتها لان فعلا مليانة حزن واني كدام الحزن كلش ضعيف

بس اذا تسمحيلي ومن بعد اذنج انه احذف كلمات قليلة منها وارجو ان ما تعتبريه تجاوز مني

كـم ألــم بيه...اســكت وأدآري
هجرني الفرح من فاركت دآري
ادري يلمحـب تعــرف... ودآري
زمانك يغالي اخذ روحك من ايديه

رووووووووووعة والله... وتكولين ما اعرف؟ لعد لو تعرفين شون؟ ???

عاشت ايدج فعلا موهوبة
بارك الله بيج وبالتوفيق

الاماني · « **رد #13 في:** Mar 25, 2011, 01:20 صباحاً »

عيني مو تره راح تسويلي واهس وصراحة اني اللي كتبته هو مني بس قديم يعني مو مال اليوم
وهذا ايضا قديم كاتبته باحد الردود وبصدق من تاليفي
----------------------------------------
هجرني الفرح يايمه وخلاني
أكطع دربي مشي للخلآني
هم بعد تريد الك خليل اني
كل البشر حولي واحس خلا بس اني
هجرك اخذ الروح وبالقبر خلاني

--------------------------------------------
ارجو اذا به خلل ان ترتبه لي تحياتي واحترامي

alarmania · « **رد #14 في:** Mar 25, 2011, 07:00 صباحاً »

هذا الزهيري للشاعر مالك الحزين

گلبي الگبل مايون بجفاك وننته
وضنيتك انته الفرح ثاريك ونه انته
مامش طيوفك واباري ابشوگ ون انته
ماخوذ مني وخيالك ابد مالحظه
ورسمك يزين النبا مبعد علي لحظه
مشتاگ اشوفك ولو مشوار لو لحظه
وين انته روحي دنت عالموت وين انته

الصديق الوفي · « **رد #15 في:** Mar 25, 2011, 07:54 صباحاً »

استاذي الفاضل هودي ولو اني اكتب شعر فصحى بس راح اجرب وهمين اريد مثل امونه امتحان شكرا على الموضوع الجميل.

alarmania · « **رد #16 في:** Mar 26, 2011, 07:05 صباحاً »

يسعد مساكم\صباحكم

لو أشـكـي همن بقلبي للنجـــوم نزلن
سبع السماوات .. من جور الزمان نزلن
وطعـوس الأجبـال.. بعـد الرفــاع إنزلن

الطيـر حـــوآم .. مـــا يسكـن النــازلـة
يسكن بروس العـلا ما يسكن النــازلـة
يــالله .. يللـي رحـمتـك علـيـنا نـــازلـة

تداوي جروحن غايبـات .. بقلبي نزلـن

swan_mo · « **رد #17 في:** Mar 26, 2011, 08:03 صباحاً »

يعني صدك تسون واهس للواحد يكتب زهيري
استاذي العزيز سيد هودي اريد منك نقد بس شوية على كيفك علينا ترة هاي اول مرة اكتب زهيري واتمنى مايطلع لونها برتقالي
تحياتي سيد هودي المحترم وعاشت ايدك على هالموضوع الممتع

بعَد عني ولاحسب عزّة وخاطر
ياخذني ليل السهر بأمل منه وخاطر
كلّ من عرف قصتي ،كال لاتجّن وتخاطر
صفيت بمحنتي صابر عالألم والهّم
ودعت الفرح ومن تراب الحزن الهّم
انطر محنّة تجي منهم وأهلهّم
جزاني بغدر ماكان على بالي وخاطر

HOWDY · « **رد #18 في:** Mar 26, 2011, 06:49 مسائاً »

مقتبس من: الاماني في Mar 25, 2011, 01:20 صباحاً

عيني مو تره راح تسويلي واهس وصراحة اني اللي كتبته هو مني بس قديم يعني مو مال اليوم
وهذا ايضا قديم كاتبته باحد الردود وبصدق من تاليفي
----------------------------------------
هجرني الفرح يايمه وخلاني
أكطع دربي مشي للخلآني
هم بعد تريد الك خليل اني
كل البشر حولي واحس خلا بس اني
هجرك اخذ الروح وبالقبر خلاني

--------------------------------------------
ارجو اذا به خلل ان ترتبه لي تحياتي واحترامي

عاشت ايدج وهو مرتب بس اني رح اخربطه هههههه

هجرني الفـرح ... يمه خـلاني
أكطع مشي دربي... للخلآني
هــم بعدك تريدني خل إلك اني
خلا حسيت بين البشر بس اني
هجـرك اخذ روحي بالقبر خلاني

بارك الله بيج اختي العزيزة

HOWDY · « **رد #19 في:** Mar 26, 2011, 06:54 مسائاً »

مقتبس من: الصديق الوفي في Mar 25, 2011, 07:54 صباحاً

استاذي الفاضل هودي ولو اني اكتب شعر فصحى بس راح اجرب وهمين اريد مثل امونه امتحان شكرا على الموضوع الجميل.

مو صار من عيوني اختي العزيزة بس تعرفين الزهيري الفصيح كلش حلو لو تجربي اكيد رح تحبي

ممنون منج اختي الكريمة

HOWDY · « **رد #20 في:** Mar 26, 2011, 06:59 مسائاً »

مقتبس من: swan_mo في Mar 26, 2011, 08:03 صباحاً

يعني صدك تسون واهس للواحد يكتب زهيري
استاذي العزيز سيد هودي اريد منك نقد بس شوية على كيفك علينا ترة هاي اول مرة اكتب زهيري واتمنى مايطلع لونها برتقالي
تحياتي سيد هودي المحترم وعاشت ايدك على هالموضوع الممتع

بعَد عني ولاحسب عزّة وخاطر
ياخذني ليل السهر بأمل منه وخاطر
كلّ من عرف قصتي ،كال لاتجّن وتخاطر
صفيت بمحنتي صابر عالألم والهّم
ودعت الفرح ومن تراب الحزن الهّم
انطر محنّة تجي منهم وأهلهّم
جزاني بغدر ماكان على بالي وخاطر

الله ...سلمت يمينك سيدتي الكريمة وبما انها اول محاولة فلا شك انك تمتلكين القدرة والبراعة في صياغة هذا النوع من الشعر

ننتظر المزيد من ابداعاتك سيدتي ودمت بود

HOWDY · « **رد #21 في:** Mar 26, 2011, 07:06 مسائاً »

مقتبس من: the peace في Mar 26, 2011, 12:27 مسائاً

انا ايضا اول مره اكتب الزهيري ارجو ان ينال اعجابكم من حيث المضمون والوز ن وكله على بعضه....
من طلت بحينا كال الكلب وي هله
ثلثين عمري اله والباقي مني الهله
ما رايد اكثر فقط اسمع حجي منهله
هواها شلني وروحي سبتها
عهد مني لامها منسبتها
اليهوديه شوكت تنسى سبتها
الطب يداوي الجرح بس الكلب منهوله

ها خويه هاودي استمر لو ابطل .... مع كل الحب
.

خوية مدكلي شتبطل... عمي اني اللي لازم ابطل ما شاء الله ولا خاب ظني جنت متاكد انه كل الاعضاء مبدعين وفعلا دا الاحظ هذا الشي
تدرون يا جماعة لو تشوفون اول زهيري كتبته جان شلتوني اني وياه وشمرتوني بالشط هههههههه

عاااشت ايدك والله بدون مجامله كلها الزهيريات روعة
والله فرحت بيكم

دايمين

HOWDY · « **رد #22 في:** Mar 26, 2011, 07:08 مسائاً »

مقتبس من: الأرمنية في Mar 26, 2011, 07:05 صباحاً

يسعد مساكم\صباحكم

لو أشـكـي همن بقلبي للنجـــوم نزلن
سبع السماوات .. من جور الزمان نزلن
وطعـوس الأجبـال.. بعـد الرفــاع إنزلن

الطيـر حـــوآم .. مـــا يسكـن النــازلـة
يسكن بروس العـلا ما يسكن النــازلـة
يــالله .. يللـي رحـمتـك علـيـنا نـــازلـة

تداوي جروحن غايبـات .. بقلبي نزلـن

الله جميل جدا بارك الله بك اختي الفاضلة

HOWDY · « **رد #23 في:** Mar 26, 2011, 07:11 مسائاً »

احب اتقدم بالشكر الجزيل لادارتنا الموقرة على التفاتتها الكريمة وتثبيت الموضوع واشكر ايضا الاخت الكريمة الارمنيه لاقتراحاتها ومشاركاتها

لا حرمني الله من كرمكم

HOWDY · « **رد #24 في:** Mar 26, 2011, 07:32 مسائاً »

الشاعر فهد بورسلي

يا ناعـسَ الطـرفْ خَـلّ مواصلكْ مِنـا
واعرفْ حالاتِ الهـوى وَصـلْ إبلا مِنـا
لا تقـولْ مِنـا وانا قـولْ الـدرب مِنـا

أخاف حسـودي يفـرق شملـنا وَهْلِـْك
تِشمتْ بِنا الناسْ وخلقْ الله وهلـي وهْلِـك

مـا دام وهلتنـي واجـب أنا وهلـك
ليما يدور الفلـك نقضـي الوطـر منـا

HOWDY · « **رد #25 في:** Mar 26, 2011, 08:38 مسائاً »

زهيري فصيح
**********

سِــرتُ بجنـاتٍ ضـمّتْ زهـوراً ... بينها

سـُـبحانَ من خـلقَ مـحاسـِـنَها وبيّنها

همستْ لي سّرَ جمالِها ...بيني وبينها

طوبى لِمن سّـبح الرحمنَ وقدّرا

أعطى جمالا لِمن شاء... وقدّرا

أعجَزنا إبداعُـهُ وغيرُه... ما قدِرا

قلبي تعلق بها... وخشيتُ ساعة بينَها

HOWDY · « **رد #26 في:** Mar 26, 2011, 08:49 مسائاً »

زهيري رباعي
*************

مشيتْ بْروضة مليانة بزهَر سبحانْ مِن صوّرْ

رياحين وعِـطِر والـوانْ چنهه لوحات و صوَرْ

تاه العقـلْ... هلحِسـنْ ما مثله يـوم إلي صوّرْ

گــالت سبّحْ الرحمنْ... وحده لِلحسـنْ صـوّرْ

alarmania · « **رد #27 في:** Mar 26, 2011, 09:38 مسائاً »

تعـرفـنـه الأصحاب لـو كالوا أبنخـوه نهـب
ونـصون وجه الصحيب وأله شـنملك نـهب
ذولـه الأصحاب اليهبونـه وألهم نهـب
كـل فـرد مـنهم يـرى الأنسان منه وبَـه
ماريد واحـد جَـشع حَـته أبـحديـثه وبـه
أضـخـم رصـيـد امتـلـك عـفه أو شهامه وبـه
ما أجـمـع الـمال مـن فايـض ومَسلك نـهـب

الاماني · « **رد #28 في:** Mar 27, 2011, 12:19 مسائاً »

اهل خير ودلال كهوة للضيف جنه
مابينه عدو ولا عركات بين عمه وجنه
بلدنه دجلة والفرات واحلى من جنه
و بدم الكللب نكتب عراقين دوم احنه

ههههههههه حلللوو مو ههههه
لا بس تره اكو عركات بين العمة والجنة ههههه تحياتي

swan_mo · « **رد #29 في:** Mar 27, 2011, 05:37 مسائاً »

اسعدني تثبيت الموضوع،الف مبروك تستحق سيد هودي كل الثناء
واشكر تشجيعك الي بكتابة الزهيري ،اشكر ذوقك ياطيب ،بس عن جد اريد تنقد مواطن الخلل والضعف حتى نتعلم منك سيدي الفاضل
تحياتي واحترامي وكبير امتناني

ياحُبكم عطر هيل ووجهكم كمر وسما اِلنا
وببعادكم لاحنّة لافرح ولا بدلّنا سملنا
بعدتوا وتالي خليتوا الهجر سمة اِلنا
يفّز كلبي لو سمع منكم صوتٍ ونادي
تسابك روحي جدمي وبأعلى صوتٍها تنادي
وجف المحنّة من دمع هالعين بفراككم نادي
جرعنا الصبر والهجر غصب عنا وسمّ النا

شراح يخلصك منا انت شجعتنا واحنا ماصدكنا

alarmania · « **رد #30 في:** Mar 27, 2011, 11:27 مسائاً »

تتبطر انت وعلــــي ماشفت منك ورد
جنت ارسل وما ترد اسكت واجامل ورد
واردك فارغ علي ماشفت منك ورد
ترسل عليه بـده وارسل عليك بجمع
ما تلتكي ومن تجي حاضرك دوم بجمع
طاحت عليك النظر وانتى التجازي بجمع
لطلع انبش بهلك العــن واسب او ارد

الاماني · « **رد #31 في:** Mar 28, 2011, 04:05 مسائاً »

شكد حلو تكتبون بس مدا اعرف مثلكم

alarmania · « **رد #32 في:** Mar 28, 2011, 08:06 مسائاً »

امونة اقري اول رد الي بالموضوع ورح تعرفين شلون اني حلو اكتب

هههههه

وهنا احب اعبر عن اعجابي الشديد باللي كتبه الاخ العزيز ذبيس صدقا زهيري روعة عاشت ايدك وننظر منك المزيد من الابداع في الزهيري والاخت العزيزة الغالية سوان مو زهيري جدا حلو عاشت ايدك وننتظر بلهفة ابداعاتك المتميزة

جم دوب اضل كاس الصبر متجرعة وشاربه
ولسان يحجي فلا يسكت اضن شاربه
والي تضن بي خير يطلع بالعكس شاربه
واكره معاش الذل وهو بيمن
خيف ولا اكول كلبي ويرتجي بيمن
كل لبن الاجواد اتعلك بعد بيمن
من حيث بالموس كصه من الاصل شاربه

HOWDY · « **رد #33 في:** Mar 29, 2011, 08:04 صباحاً »

مقتبس من: swan_mo في Mar 27, 2011, 05:37 مسائاً

اسعدني تثبيت الموضوع،الف مبروك تستحق سيد هودي كل الثناء
واشكر تشجيعك الي بكتابة الزهيري ،اشكر ذوقك ياطيب ،بس عن جد اريد تنقد مواطن الخلل والضعف حتى نتعلم منك سيدي الفاضل
تحياتي واحترامي وكبير امتناني

ياحُبكم عطر هيل ووجهكم كمر وسما اِلنا
وببعادكم لاحنّة لافرح ولا بدلّنا سملنا
بعدتوا وتالي خليتوا الهجر سمة اِلنا
يفّز كلبي لو سمع منكم صوتٍ ونادي
تسابك روحي جدمي وبأعلى صوتٍها تنادي
وجف المحنّة من دمع هالعين بفراككم نادي
جرعنا الصبر والهجر غصب عنا وسمّ النا

شراح يخلصك منا انت شجعتنا واحنا ماصدكنا

سيدتي الفاضلة

الف شكر لتهنئتك الرقيقة لا حرمني الله من كرمك البالغ
والله بدون اي مجاملة ما جئت به رائع جدا وينم عن اقتدار عالي في مجال الشعر عامة والزهيري خاصة
اما بالنسبة لبيان مواطن الضعف فذلك امر يشق علي الى اقصى الحدود فانا ابحث عن مكامن الجمال في اي قصيدة وما يبدو لي جيد قد يبدو لغيري بشكل اخر فمن المستحيل اتفاق جميع الاراء على امر واحد ...وانا ادرك جيدا اعتزاز الاديب بكل كلمة يسطرها فقد افرغ فيها جل احاسيسه ومستواها لا يغير اعتزازه بها اطلاقا...واعود لاثني على ما جئت به من زهيري مفعم بروح الاحساس والاناقة وانا واثق ان الاكثار من قرااءة الشعر سيصقل موهبتك الواضحة وستشرقين علينا بجديدك باذن الله
باركك الله ودمت بكل الود

HOWDY · « **رد #34 في:** Mar 29, 2011, 08:30 صباحاً »

مقتبس من: the peace في Mar 27, 2011, 06:03 مسائاً

صح اخي هاودي مثل ما تفضلت الاخت ام محمد اشر على مواطن الخخل حتى الواحد يصلحها .. هناك اخت لحد الان متعرف شلون ينكتب الزهيري يعني عدد القوافي وكم شطر وباي قافيه ينتهي.ولو فد فكره مبسطه عن الاوزان.. انت ما يصير ياعو اليكتب تكله عاشت ايدك ههههههه ..... مع الاعتذار

اخوية العزيز

بصراحة ما فهمت شتقصد من عدد القوافي وكم شطر واي قافية ينتهي ...اني نطيت فكرة عن الزهيري بناء على طلب احدى الاخوات الكريمات وبينت انواعة بشكل مبسط والشي الوحيد اللي ما ذكرته هو اسم الشيخ اللي ينسب اله الزهيري وفرصة ان اذكره وهو الشيخ عبد الله الزهير
اما بخصوص الاوزان والقافية فهذا الشي يحتاج الى وقت طويل ربما سنوات من الدراسة للالمام بها
واعيد واكرر اعجابي البالغ بالزهيري اللي نورت بي الصفحة والله تفاجات بالمستوى العالي اللي كتبته بي وعندي يقين انه بالممارسة المستمرة رح توصل الى ارقى درجات الابداع

الله يبارك بيك

HOWDY · « **رد #35 في:** Mar 29, 2011, 08:39 صباحاً »

مقتبس من: الاماني في Mar 27, 2011, 12:19 مسائاً

اهل خير ودلال كهوة للضيف جنه
مابينه عدو ولا عركات بين عمه وجنه
بلدنه دجلة والفرات واحلى من جنه
و بدم الكللب نكتب عراقين دوم احنه

ههههههههه حلللوو مو ههههه
لا بس تره اكو عركات بين العمة والجنة ههههه تحياتي

الله والله ريحة الكهوة والهيل ملت المكان بس الله يخليج خلي العمة بغرفتها والجنة بغرفته وخلينا نشرب الكهوة ببال رايق وصافي

طبعا مزيج رائع من الاصالة واالكرم والطيبة

كلش حلو الزهير ي اللي كاتبته

عاشت ايدج وبارك الله بيج

الاماني · « **رد #36 في:** Mar 29, 2011, 01:07 مسائاً »

طبعا احنه بهذا الموضوع منكدر نوصل لاساتذة وعباقرة الزهيري بس اكيد الاجتهاد حلو ويدعو ان الواحد يشجع اللي عنده رغبة وحب بهذا النمط بس ميعرف يكتب او يعبر
يمكن بمرور الايام يتحسن وهو طبعا الحجي موجه لي لاني صفر بالزهيري هههههه
يعني اني اعتقد مو مشكله اذا منركز على القوافي والقواعد بكد ما هو حلو بالعفوية ههههه
الارمنية اي قريت ردك الاول عمي طلعتي تعرفين تكتبين لعد شو بس اني ههههه
تحياتي وحبي لك حبيبة وان كان منقول فلك الشكر انك بحثت وتعبت لتبهجينا اشكرك

♥♥ RoLa ♥♥ · « **رد #37 في:** Apr 02, 2011, 09:39 مسائاً »

عااااااااشت ايدك هاوووودي الوووووورد

ابدعت ياوردة

تحياتي رولاااااا

alarmania · « **رد #38 في:** Apr 03, 2011, 06:04 صباحاً »

يا صـاح انا اخـوك لو جـار الـدهـر صـاحبك
سـكـران بـمـودتـك مـا يـوم انــــــا صـاحـبك
أنهظم لو اشوف غيري من الخلق صـاحبك
عـنـدك دقـايـق قـشـر تـمـرد قليبي مــــــــرد
وكـم عـاذلـن لامـنـي وانا لعـذولـي مـــــــرد
وانـت الـعـرفـتـك يـا كـريــــــــــم و مـــــــرد
لـكـن ألـف يـا حـيـف ما تعرف قـدر صاحبك

alarmania · « **رد #39 في:** Apr 04, 2011, 11:16 مسائاً »

الطيب منكم بده مثل النهر جاري
وبيكم صفات الكرم للضيف والجاري
انتو ملاذ الدخل والمار والجاري
وجبال هيبه وسكن للروح مأمنها
وسيوف صرتو تگص العال ما منها
لمة نشامه وفخر والشين ما منها
تبقون سور ونخل للبيت والجاري

alarmania · « **رد #40 في:** Apr 06, 2011, 08:02 صباحاً »

لليحب والمايحب وللي يضد مايلي
جفي اعتنه بطحيتي محد عدل مايلي

تانيت بس ما اجا عمر الفرح مايلي
وخلي واذا ما اجا ما بينت خلته

انه ليالي الحزن اكثر صبر خلته
خاف الشمس غشتة وجوة النجم خلته

شيكول غيمة صفة انه النهر ماي الي

the peace · « **رد #41 في:** Apr 06, 2011, 11:32 مسائاً »

عزيزتي الارمنيه ..هسه هذا الزهيري كلش حلو هل هو من تاليفك ؟؟كلونه حتى الواحد يعرف راسه من رجليه
الزهيري ادناه من تاليفي وبكل فخر هههههههههههههههههه .

اتمنى اشم خدكم واتمنى ابوس ال وجن
ناطر دربكم صرت احسب الراحن وجن
كالوا لاهلي ابنكم يمكن تخبل وجن

بالليل كالوا حبيبك غادر الحي وسرى ............................معناها سافر ليلا

وخلاني حبك صنم للموت لازم سرى
ومحد درى بحسبتي لا الارمنيه وسرى
ونيران بحشاشتي من فركتك وجن

.

الاماني · « **رد #42 في:** Apr 07, 2011, 12:05 صباحاً »

الارمنية باكثر من مرة قالت انها لا تجيد تاليف الدارمي او الزهيري وقالت كلها منقولة مما راق لها
يلله هسه منا ورايح كلنا عرفنه ان الارمنية بدورة تدريب هههههه وهسه نصبر فترة ونشوفهه استاذة بالزهيري
طالما عندها دافع ورغبة
تحياتي واحترامي للجميع

alarmania · « **رد #43 في:** Apr 07, 2011, 02:43 صباحاً »

مقتبس من: the peace في Apr 06, 2011, 11:32 مسائاً

عزيزتي الارمنيه ..هسه هذا الزهيري كلش حلو هل هو من تاليفك ؟؟كلونه حتى الواحد يعرف راسه من رجليه
الزهيري ادناه من تاليفي وبكل فخر هههههههههههههههههه .

اتمنى اشم خدكم واتمنى ابوس ال وجن
ناطر دربكم صرت احسب الراحن وجن
كالوا لاهلي ابنكم يمكن تخبل وجن

بالليل كالوا حبيبك غادر الحي وسرى ............................معناها سافر ليلا

وخلاني حبك صنم للموت لازم سرى
ومحد درى بحسبتي لا الارمنيه وسرى
ونيران بحشاشتي من فركتك وجن

.

صديقي المحترم السلام

تتصور الارمنية تعرف تكتب زهيري ههههههههههههه؟؟؟ حتى تعرف اقرا ردي هذا للزميل هودي

((وهاي طبعا منقولة كذب الارمنية تعرف تكتب زهيري ههههههههه ))

هههههه لكن جدا احب الاشعار بصورة عامة والصراحة اكولك لو حاولت الكتابة رح اكدر اكتب واني واثقة من كلامي
لكن مكتفية بالكوبي بيست هههههههههه

وشكرا الك للزهيري الرائع جدا عاشت ايدك يارب وتحياتي الك

alarmania · « **رد #44 في:** Apr 07, 2011, 02:53 صباحاً »

مقتبس من: الاماني في Apr 07, 2011, 12:05 صباحاً

الارمنية باكثر من مرة قالت انها لا تجيد تاليف الدارمي او الزهيري وقالت كلها منقولة مما راق لها
يلله هسه منا ورايح كلنا عرفنه ان الارمنية بدورة تدريب هههههه وهسه نصبر فترة ونشوفهه استاذة بالزهيري
طالما عندها دافع ورغبة
تحياتي واحترامي للجميع

ههههههههههههه امونة عمي اني وين اصير استاذة حبيبة بكم الاستاذة الرائعين
الموجودين هنا صدقا اقلام رائعة دا اشوفها تكتب زهيريات هنا
تحية احترام واعتزاز كبير باقلامكم الرائعة حقا

swan_mo · « **رد #45 في:** Apr 07, 2011, 10:39 صباحاً »

صعب أنسى هواكم وفرح كلبي الما عرف عنكم يظِّل
تراني من دهر ميّزت روحك ونورك وظل
حرف اسمك واسمي ضوا الهن انتَ وظلّ
لاتخالف وتجيني بالف عنوانٍ وخاتمة
تراني اعترف صرت بايده محبس وخاتمة
وعشك هالروح لحبك حلف وأعلن خاتمة
والك وحدك فرشت الصبر بوضوح شمسينٍ وظل

alarmania · « **رد #46 في:** Apr 07, 2011, 11:12 صباحاً »

ياساكن روحي هاك استمع مايلي..
وحدك عشت بالكَلب وغيرك ابد ماالي..

عطشان تني لشوفتك يلشوفتك ماي الي...
والشبع من شوفتك كل عمره يبقه عدل...

وياك مااخلفت صدكني ماشي عدل...
لاترضه قاضي شرع لاترضه حاكم عدل...

للناس تحكم عدل وحكمك عليه مايلي..

swan_mo · « **رد #47 في:** Apr 07, 2011, 07:21 مسائاً »

لا سلام ليش ازعل واني وياك حسيت بيه شوية نشاز
لان بصراحة اني من احد يضووووجني اصير مااعرف اكتب
وبما انه مامموسق يلة انتظر منك تموسقه حتى اعرف وين كان الخلل
مداخلتك رائعة وزهيري جدا حلو

لاتظل تحلف تدور وتلف
عنك ماأتوه لاتظن احتار والف
اعرف نبض كلبك بين مليون والف
ماطلبنا منك محبس ولاخاتمة
وين عهد الهوى وين امضاءه وخاتمة
تعال خلي لحزن كلبي برجوعك خاتمة
ولو بعد سنتين والف كلبك مايصير لغيري ولف

alarmania · « **رد #48 في:** Apr 08, 2011, 06:29 صباحاً »

عاشت ايديكم اعزائي سوان مو & السلام

زهيريات روووووعة

وهاي مني لكن السلام مو اني كاتبتة ترا منقولة

يامن نسيت اللذي ابعمرة الك خاطرة
بالجذب مامر على بالك ابد خاطرة

وانة بدموع الهجر كاتب الك خاطرة
صدكني هذا الكلب غيرك ابد ماهوة

ضل عالي علو النجم حبك ابد ماهوة
بالله اريد اسألك عن السبب ماهوة

الشايل حنينة الك ليش اكسرت خاطرة

HOWDY · « **رد #49 في:** Apr 09, 2011, 02:21 مسائاً »

مقتبس من: ♥♥ RoLa ♥♥ في Apr 02, 2011, 09:39 مسائاً

عااااااااشت ايدك هاوووودي الوووووورد

ابدعت ياوردة

تحياتي رولاااااا

تسلمين وايدج العايشة رولا الوردة يا مثال الرقة والذوق الراقي

الأخبار:

المحرر موضوع: زهيريات وعتابة ... (زيارة 113557 مرات)